Երկրորդ
կեսի կորուստը տղամարդիկ կանանցից ծանր են տանում։ Ինչպես հաղորդում է The
Daily Mail-ը, Ամերիկայում Ռոչեստերի տեխնոլոգիական ինստիտուտի
հետազոտողները պարզել են, որ իրենց կանանց կորցրած տղամարդկանց մահվան
ռիսկը միջին ցուցանիշի համեմատ աճում է 30%-ով։ Այդ թիվը բացահայտվել է
1910-1930 թվականներին ծնված ամուսնացած մարդկանց տվյալների վերլուծության
արդյունքում։
«Տղամարդիկ
շատ հաճախ պատրաստ չեն լինում կնոջ մահվանը, այդ իսկ պատճառով էլ այդ
կորուստն ազդում է նրանց առողջության վրա։ Չէ՞ որ կանայք որպես կանոն, հոգ
են տանում ամուսնու ֆիզիկական եւ հոգեկան վիճակի մասին», - իր
հայտնագործությունը մեկնաբանում է պրոֆեսոր Խավյեր Էսպինոզան։
Կանանց
մահվան ռիսկն ամուսնու մահի դեպքում չի աճում, բայց նրա «թույլ տեղը»
երեխաներն են։ Երեխա կորցրած մոր մահվան ռիսկը մեծանում է ամբողջ 133%-ով։
Այս տվյալները գիտնականները ստացել են, հետազոտելով 20-50 տարեկան եւ
տարբեր ժամանակներում երեխա կորցրած կանանց 69 հազար անկետա։ Ինչպես նշել
են գիտնականները, մայրական մահացության ցուցանիշի վրա չեն ազդել ո՛չ
երեխայի սեռը, ո՛չ եկամտի կամ մոր կրթության մակարդակը, ո՛չ էլ ընտանեկան
կարգավիճակը։
Այս
հետազոտությունն ապացուցում է, որ հոգեկան ապրումներից հնարավոր է
մահանալ։ Ռոստոկի համալսարանական կլինիկայի գիտնականները հաստատել են, որ
ցանկացած ուժեղ հուզական ապրումի ժամանակ օրգանիզմն արտադրում է սթրեսի
հորմոն, այդ թվում նաեւ՝ ադրենալին, որը նեղացնում է սիրտն արյունով
սնուցող զարկերակները։ Սրտի ռիթմի փոփոխությունն այս դեպքում շատ նման է
սրտային սուր նոպայի։
